🛑 सांगलीवाडी टोल नाक्यावर शिवशाही-मोटरसायकल अपघात : एकाचा मृत्यू, एक गंभीर जखमी

 आज (१६ जुलै) सकाळी सांगलीवाडी टोल नाका परिसरात झालेल्या दुर्दैवी अपघातात एक युवक जागीच ठार झाला असून दुसरा गंभीर जखमी झाला आहे. शिवशाही बस व मोटरसायकल यांच्यात झालेल्या या भीषण अपघातामुळे परिसरात मोठी खळबळ उडाली आहे.

प्राथमिक माहितीनुसार, शिवशाही बस भरधाव वेगाने निघत असताना अचानक मोटरसायकल आडवी आल्याने धडक झाली. अपघातात एक युवक जागीच ठार झाला असून दुसऱ्याला तात्काळ रुग्णालयात दाखल करण्यात आले आहे.

अपघाताचे नेमके कारण पाहता, नॅशनल हायवेवरील स्पीड ब्रेकर पट्ट्यांची संख्या अत्यंत अपुरी असल्यामुळे वाहनांचा वेग कमी होत नाही. परिणामी वारंवार अपघात होत आहेत. याला थेट जबाबदार नॅशनल हायवेचे संबंधित अधिकारी व कंत्राटदार आहेत, असा आरोप स्थानिक नागरिकांनी केला आहे.

नागरिकांनी मागणी केली आहे की, अपघातास कारणीभूत ठरलेल्या अधिकाऱ्यांवर व कंत्राटदारावर मनुष्यवधाचा गुन्हा दाखल करण्यात यावा आणि योग्य ती सुरक्षा व्यवस्था तात्काळ करण्यात यावी.