गोंदिया जिल्ह्यातील देवरी तालुक्यातील ग्रामपंचायत मुल्ला येथील शेतकऱ्यांनी रब्बी हंगामात धान पिकासाठी आवश्यक वीजपुरवठ्याच्या मागणीसाठी ठोस पावले उचलली आहेत. वारंवार विनंती करूनही वीजपुरवठ्यात अडथळे निर्माण होत असल्यामुळे, अखेर संतप्त शेतकऱ्यांनी रात्री 10 वाजता वीज विभागाच्या कार्यालयासमोर ठिय्या आंदोलन छेडले.
या आंदोलनात जवळपास 100 हून अधिक शेतकरी सहभागी झाले होते. त्यांच्या मागण्या आणि व्यथा ऐकण्यासाठी आमदार संजय पुराम यांच्या पत्नी व जिल्हा परिषद सदस्या सविता पुराम यांनी आंदोलनस्थळी उपस्थिती दर्शवली. त्यांनी शेतकऱ्यांच्या समस्या ऐकून घेत त्यांना पाठींबा दिला.
दरम्यान, वीज विभागाच्या अधिकाऱ्यांनी लोड शेडिंगची समस्या तात्काळ सोडवून पुढील दहा दिवस पुरेसा वीजपुरवठा सुरळीत करण्याचे आश्वासन दिले. यासोबतच, दहा दिवसांनंतर कोणतीही अडचण निर्माण होणार नाही, याची खात्रीही अधिकाऱ्यांनी दिली आहे.
मात्र, शेतकऱ्यांनी स्पष्ट इशारा दिला आहे की, जर दहा दिवसांनंतर मागण्या पूर्ण झाल्या नाहीत, तर संपूर्ण कुटुंबासह वीज विभागाच्या कार्यालयासमोर ठिय्या आंदोलन करण्यात येईल.
0 Comments