सांगलीत माय ह्युंदाई शोरूममध्ये थरारक चोरी; दहा लाखांचा ऐवज लंपास, चोरट्यांची सुरक्षा रक्षकांवर दगडफेक

 सांगलीत माय ह्युंदाई शोरूममध्ये थरारक चोरी; दहा लाखांचा ऐवज लंपास, चोरट्यांची सुरक्षा रक्षकांवर दगडफेक

सांगली – कोल्हापूर रस्त्यावरील अंकली हद्दीत असलेल्या माय ह्युंदाई शोरूममध्ये बुधवारी मध्यरात्री अज्ञात चोरट्यांनी तगड्या सुरक्षा यंत्रणेला आव्हान देत सुमारे दहा लाखांचा ऐवज लंपास केला. चोरट्यांनी भिंतीवरून आत प्रवेश करून, पहिल्या मजल्यावरील खिडकीतून शोरूममध्ये प्रवेश मिळवला आणि जिन्याखाली असलेल्या कॅश कक्षाजवळ ठेवलेली गोदरेज कंपनीची तिजोरीच उचलून नेली.

तिजोरीत ९,५३२ रुपयांच्या सोन्याच्या नथ आणि ९,५९,४५१ रुपयांची रोकड असा एकूण दहा लाख रुपयांचा ऐवज होता. चोरीवेळी चोरट्यांनी सुरक्षा रक्षकांना तपासणी करताना पाहिलं आणि त्यांच्यावर दगडफेक करत पळ काढला.

शोरूमच्या कर्मचारी संतोष रधुनाथ कोळी (वय ३७, रा. पद्माळे, ता. मिरज) यांनी याप्रकरणी फिर्याद दिली असून पाच चोरटे सीसीटीव्हीत कैद झाले आहेत.

घटनेची माहिती मिळताच पोलिस उपाधीक्षक प्रणिल गिल्डा, ग्रामिण पोलीस निरीक्षक किरण चौगले, एलसीबी निरीक्षक सतीश शिंदे यांनी घटनास्थळी भेट दिली. श्वान पथक व ठसेतज्ज्ञांच्या मदतीने शोधमोहीम सुरू करण्यात आली आहे.