गोंदिया— मेरिटोरियस पब्लिक स्कूल, तिरोडा यांच्या शैक्षणिक सहलीदरम्यान जयपूर येथे आयोजित Nextgen Talk कार्यक्रमात पोलिस विभागाचे डी.आय.जी. परिस देशमुख यांनी विद्यार्थ्यांना प्रेरणादायी मार्गदर्शन दिले.
आपल्या भाषणात त्यांनी सांगितले की, “जीवनात यश मिळवण्यासाठी केवळ मेहनत पुरेशी नसते; त्यासाठी स्पष्ट उद्दिष्ट, समर्पण आणि सातत्यपूर्ण प्रयत्न आवश्यक असतात. जो व्यक्ती आपल्या ध्येयाशी प्रामाणिक राहतो, तोच खऱ्या अर्थाने यशस्वी होतो.”
देशमुख यांनी विद्यार्थ्यांना आत्मअनुशासन, प्रामाणिकपणा आणि समाजसेवेचं महत्त्व समजावून सांगितलं. त्यांनी तरुण पिढीला आपल्या क्षमतांची जाणीव ठेवून राष्ट्रनिर्माणात सकारात्मक योगदान देण्याचे आवाहन केले.
या प्रसंगी शाळेचे संचालक मुकेश अग्रवाल आणि प्राचार्य प्रफुल तिवारी यांनी डी.आय.जी. देशमुख यांचे पुष्पगुच्छ देऊन स्वागत केले. विद्यार्थ्यांनी करिअर, नेतृत्व, पोलिस सेवा आणि जीवनमूल्यांबाबत अनेक प्रश्न विचारले, ज्यांची देशमुख यांनी संयमपूर्वक आणि प्रेरक शैलीत उत्तरे दिली.
या कार्यक्रमाला देशमुख यांचे वडील, माजी समाजकल्याण अधिकारी अनिल देशमुख देखील उपस्थित होते. त्यांनी विद्यार्थ्यांना संबोधित करताना सांगितले की, “खरे यश हे माणसाच्या संस्कार, विनम्रता आणि प्रामाणिकतेत दडलेले असते.” त्यांनी विद्यार्थ्यांना परिश्रम, इमानदारी आणि समाजाभिमुखतेने पुढे जाण्याचे मार्गदर्शन केले.
जयपूरमधील या Nextgen Talk सत्रामुळे विद्यार्थ्यांना केवळ शिक्षणच नव्हे, तर जीवनमूल्य आणि प्रेरणा मिळाली. शाळेच्या परिवाराने डी.आय.जी. परिस देशमुख आणि अनिल देशमुख यांचे मनःपूर्वक आभार मानले आणि अशा सत्रांनी विद्यार्थ्यांचा सर्वांगीण विकास होतो असे मत व्यक्त केले
0 Comments